Security escort sa mga doctor to the barrio pinag-aaralan na

Mahigpit nang pinag aaralan ng DOH o Department of Health ang pagbibigay ng security escort at dagdag na kumpensasyon sa mga tinaguriang doctors to the barrios partikular yung mga nakatalaga sa conflict affected areas.

Binigyang diin ito sa DWIZ ni Health Secretary Paulyn Ubial kasunod nang pagkakapaslang sa isa na namang volunteer doctor na si Dr. Sajid ‘Jaja’ Sinulinding sa Cotabato City.

Partikular dito aniya ang dagdag na mga benepisyo bukod pa sa regular na hazard pay.

“Yan po ay pinag-aaralan pa natin kasama ng pag-aaral din sa mga benepisyo ng mga doktor na nagtatrabaho sa mga conflict affected areas katulad ng Cotabato City at ibang parte ng Mindanao na medyo mataas ang rate ng mga ganitong insidente, at pinag-aaralan din po natin na sa tulong ng PNP at mga ahensya ng gobyerno kung paano ma-ensure ang safety hindi lamang ng mga doktor kundi ng buong komunidad.” Ani Ubial

Dr. Sinulinding murder case

Samantala, tuluy-tuloy ang pakikipag-ugnayan ng DOH sa mga awtoridad kaugnay sa kaso nang pinaslang ng isa pang tinaguriang doctor to the barrios.

Ipinabatid ito sa DWIZ ni Health Secretary Paulyn Ubial kasunod nang paghahatid sa huling hantungan kay Dr. Sajid ‘Jaja’ Sinulinding na binaril mismo sa kaniyang clinic sa Cotabato City ng isang nagpanggap na pasyente.

Sinabi pa ni Ubial na napag-alaman niya sa mga kaanak ni Sinulinding ang banta sa buhay sa isa sa mga miyembro ng pamilya na maaaring sinalo ng nasabing doktor.

“Naka-usap ko yung kanyang kapatid ang ARMM Secretary of Health si Dr. Jojo Sinulinding meron pong apparently threat sa pamilya nila, merong nagbabanta na manakit o pumatay sa isang miyembro ng pamilya nila, yun po ang suspek o yung parang lead nila.” Pahayag ni Ubial

By Judith Larino | Ratsada Balita (Interview)  

Comments

comments