Kumambyo si Senador Ronald “Bato” Dela Rosa sa pahayag nitong handa siyang sumuko para masamahan at maalagaan si dating Pangulong Rodrigo Duterte na kasalukuyang nasa kustodiya ng International Criminal Court.
Ito ay matapos aminin ni Senador Dela Rosa na ikinukunsidera niyang magtago na lamang, sa oras na maglabas ng warrant of arrest ang ICC laban sa kanya.
Sinabi ng Mambabatas na mahirap pala ang sitwasyon sa detention facility ng ICC dahil mismong ang anak ni dating pangulong Rodrigo Duterte na si Vice President Sara Duterte ay hindi basta-basta nakakalapit at nakabibisita sa ama nito.
Ayon kay Senador Dela Rosa, ikinukunsidera niyang manatili sa Senado upang maiwasan ang pag-aresto sa kanya.
Gayunman, nilinaw ng Senador na lalabas ito ng senado sa oras na palayasin na siya ni Senate President Francis “Chiz” Escudero.
Nauna nang sinabi ni SP Escudero na papayagan naman niyang magtago sa Senado si Senador Dela Rosa ngunit hindi anya ito maaring manatili panghabambuhay sa nasabing gusali. —sa panulat ni John Riz Calata
