Dead on arrival ang isang 85 – anyos na lalaki matapos saksakin at bagsakan pa ng malaking bato sa mukha ng kanyang sariling pamangkin sa Negros Occidental.
Hindi na naisalba pa ng mga doktor ang biktimang si Nilo Paguntalan na nagtamo ng malalang pinsala sa ulo at saksak sa katawan.
Sa imbestigasyon ng Pontevedra Municipal Police, pinigilan ng lolo ang kaniyang pamangking nang mahuli niya itong sinusunog nito ang kanilang bahay gamit ang pinatuyong dahon
Gayunman, nagwala ang pamangkin at kumuha ng putol na payong at sinaksak ang kanyang tiyuhin sa katawan.
Hindi pa nakuntento ang suspek, kumuha ng malaking tipak ng bato at ipinalo sa ulo ng nakahandusay at duguang matanda.
Ayon sa mga kaanak, hindi umano nakainom ng gamot ang suspek dahilan upang magwala at naging bayolente ito na nauwi sa pagpatay sa kanyang tiyuhin.
Nakakulong naman sa Pontevedra Municipal Police Station ang suspek na nakilalang si Jefrey, 36-anyos, na umano’y mayroong diperensya sa pag-iisip.
