Binalaan ni Philippine National Police o PNP Chief General Debold Sinas ang ilan pang nakalalayang suspek sa umano’y pagpatay sa flight attendant na si Christine Dacera.
Ayon kay Sinas, kanyang binibigyan ng 72 oras o 3 araw ang mga nabanggit na suspek para sumuko.
Kung mabibigo aniya ang mga ito na kusang magtungo sa pulisya mapipilitan siyang ipag-utos ang pagtugis sa mga ito na posibleng gamitan ng puwersa kung kinakailangan.
Babala pa ni Sinas, aarestuhin din maging ang mga kamag-anak ng mga suspek na tutulong sa mga ito na makatakas.
Una nang sinabi ng PNP na hawak na nila ang tatlo sa 11 itinuturing na suspek sa insidente at ipinagharap na rin sa kasong rape with homicide.
