Nagkasagutan at nagkainitan sina House Speaker Pantaleon Alvarez at MRT General Manager Rodolfo Garcia sa gitna ng joint meeting ng House Committee on Transportation at Committee on Public Works and Highways.
Ito ay matapos na makailang ulit na kwestyunin ni Alvarez ang ‘competence’ ni Garcia dahil sa ilang ulit na aberya sa MRT.
Dahil dito, napikon si Garcia at saka pinagtaasan ng boses si Alvarez sabay sinabing gusto na nitong magbitiw sa puwesto.
Pumagitna naman si House Majority Leader Rodolfo Fariñas sa nangyaring tensyon para pakalmahin si Garcia.
Nang kumalma na ay humingi ng paumanhin si Garcia kay Alvarez, bagay na tinanggap naman ng Speaker.
Matatandaang hinamon noon ni Alvarez si Garcia na magbitiw sa puwesto dahil sa tagal na aniya nitong nakaupo sa posisyon ay hindi pa rin maayos-ayos ang maintenance ng MRT.
