Napatay ng mga miyembro ng elite Thai police unit ang suspek sa pamamaril sa isang mall sa Thailand.
Ayon sa hepe ng Crime Suppression Division ng Thailand, tumagal ng halos 17 oras ang paghahanap sa suspek sa loob ng Terminal 21 Mall sa Nakhon Ratchasima kung saan ito walang habas na namaril.
Una nang kinilala ng Thai police ang suspek na si Sergeant Major Jakrapanth Thomma, isang junior army officer.
Batay sa ulat, isang armas na ninakaw nito sa kanilang barracks ang ginamit ng suspek sa walang habas na pamamaril na nagawa pa nitong ipost sa Facebook.
Sa opisyal na datus naman ng Thai authorities, umabot sa 20 ang nasawi sa insidente habang 42 ang sugatan kabilang na ang 9 na kinailangang isailalim sa operasyon.
