(Updated)
Sumampa na sa lima ang patay sa sunog sa Manila Pavilion Hotel sa Ermita Maynila na nagsimula pa kahapon.
Ito ang kinumpirma ni PAGCOR Assistant Vice President for Communications Carmelita Valdez kung saan ang mga nasawi ay empleyadong lahat ng Philippine Amusement and Gaming Corporation.
Ayon kay Valdez, pagkakalooban ng ahensya tig-isandaang libong piso (P100,000) ang bawat pamilya ng mga nasawi sa trahedya.
Kasabay nito, sinabi ni Valdez na walang dapat ikabahala ang mga nakaligtas na empleyado ng PAGCOR sa Manila Pavilion.
Aniya ililipat lamang ng lugar ang mga ito para patuloy pa rin ang kanilang trabaho.
Una rito, alas-10:56 ng umaga kanina nang ideklara ng Bureau of Fire Protection na tuluyan nang naapula ang sunog sa Manila Pavilion.
(May Ulat ni Aya Yupangco)
