Iniimbestigahan pa ng BFP o Bureau of Fire Protection ang naging sanhi ng sunog kahapon sa bahagi ng supermarket sa loob ng isang shopping center sa Monumento , Caloocan.
Ngunit ayon kay CAMANAVA District Fire Marshal Fire Supt. Crispo Diaz posibleng combustion ng electrical wiring sa loob ng stockroom ng Robinsons market sa Victory Central Mall ang naging dahilan ng sunog.
Batay sa ulat ng BFP , nagsimula ang nasabing sunog dakong alas 7:00 ng umaga kahapon at umabot lamang sa unang alarma.
Wala rin anilang nasugatan sa nasabing insidente.
Tinatayang aabot sa mahigit tatlong daang libong Piso ang kabuuang halaga ng pinsala ng sunog.
Ito na ang ikatlong pagkakataon na nagkaroon ng insidente ng sunog sa Victory Central Mall kung saan ang una ay noong May 2012 at ikalawa ay noong May 2015.
—-
