Naaresto na sa ikinasang follow up operations ng City of San Jose del Monte Police Station sa Bulacan ang suspek sa pagpatay sa 5-taong gulang na kinder student, 12:20 kaninang madaling araw.
Ayon kay P/LtC. Orlando Castil, ang hepe ng San Jose del Monte City Police, nakatanggap sila ng tip na makikipagkita ang suspek na kinilalang si Eman Lambuhon, 24 anyos sa kaniyang kaibigan sa Brgy. Sto. Cristo kaya’t agad na silang nagkasa ng operasyon para dakpin ito.
Magugunitang noong araw ng linggo, dinukot muna ang biktima ni Lambuhon na sinasabing sabog sa iligal na droga at pinagtangkaan pa niya itong gahasain pero nabigo inang habulin na siya ng ina ng biktima.
Sa isang talahiban sa Brgy. Kaypian, pinukpok ni Lambuhon ng bato sa ulo ang biktima na nagresulta sa agaran nitong kamatayan at saka iniwan sa masukal na bahagi ng lugar kung saan nakita ang labi kahapon.
Dahil dito, mahaharap sa patumpatong na kaso ang suspek at isasailalim na rin ito sa inquest proceedings sa sandaling ganap nang maisampa ang kaso sa korte laban dito.
