Muling kinalampag ni senadora grace poe ang Land Transportation Office (LTO) hinggil sa talamak na anomalya at katiwaliang namamayagpag sa naturang tanggapan.
Ito’y makaraang ibunyag ng Senadora ang modus ng ibang mga opisyal at kawani ng LTO dahil umano sa no show o non-appearance ng mga sasakyan na nagpaparenew sa kanilang rehistro at prangkisa.
Giit ni Poe, nakababahala aniyang isipin na nalalagay sa alanganin ang kaligtasan ng mga pasahero dahil sa mga tiwaling opisyal na tumatanggap ng suhol mula sa mga bus companies para palusutin ang kanilang mga sasakyan.
Ginawa ng Senadora ang pahayag makaraang masangkot sa aksidente ang isang unit ng Dimple Star Bus sa Occidental Mindoro nuong isang linggo na ikinasawi ng 19 at ikinasugat ng mahigit dalawampung pasahero nito.
