Nagnegatibo na sa coronavirus disease 2019 (COVID-19) si Technical Education and Skills Development Authority (TESDA) Director General Isidro Lapeña.
Ito’y makaraang lumabas na negatibo na siya sa virus sa magkasunod na coronavirus disease 2019 (COVID-19) test.
Pero, ani Lapeña, bagamat nagnegatibo na ito sa virus, iginiit niya na kanyang ipagpapatuloy ang pagka-quarantine.
Nauna rito, dumalo si Lapeña sa senado para sa pagdinig ng panukalang budget ng TESDA sa susunod na taon, kung saan dinaluhan din ito ni Senador Ronald ‘Bato’ Dela Rosa na dinapuan din ng virus.
Pero, ani Lapeña, hindi nito sa senado nakuha ang virus, at sa halip sa ibang lugar na kanyang napuntahan.
Sa huli, iginiit ni Lapeña na may natutunan siya sa aniya’y pagsubok na ito, ‘yan ang ibayong pag-iingat at mas lalo pang paghihigpit sa pagsunod sa mga health protocols.
