Inamin ng nahuling top drug personality sa Western Visayas ang ugnayan sa dalawang alkalde sa lalawigan ng Iloilo.
Ibinunyag ni Arturo Balume Sr. na dati siyang nagtrabaho kina dating Mayor Neptali Salcedo ng Sara, Iloilo at Mayor Rene Cordero ng bayan ng Estancia.
Gayunman, itinanggi ni Balume na nagsilbi siyang hitman ng mga nasabing alkalde at trabaho niya lamang kay Mayor Cordero ay magbantay ng fishing port sa Estancia.
Sinabi ni Balume na matagal na niyang gustong sumuko subalit natatakot dahil sa mga nakikitang pinapatay na sumusuko.
Itinanggi pa ni Balume na pag-aari niya ang kalibre trenta’y otso at kuwarenta’y singkong baril at 10 gramo ng shabu na nakuha mula sa sasakyan nito sa operasyon sa Brgy. Poblacion, Hinobaan, Negros Occidental.
Planted aniya ang mga nasabing ebidensya.
—-
