“Tuloy ang trabaho.”
Ito ang pagtitiyak ni Bayan Muna Partylist Representative Carlos Isagani Zarate matapos na maalisan ng committee chairmanship sa Kamara.
Sa panayam ng “Ratsada Balita”, sinabi ni Zarate na mas magiging aktibo sila ngayon dahil mas may kalayaan na silang isakatuparan ang kanilang mga adbokasiya.
“Practically ang role as chair is to preside at administratively ikaw nagpapatakbo ng komite, kung pagsusulong ng mga batas tuluy-tuloy pa rin tayo kahit miyembro na lang tayo ng komite, nawala lang yung administrative role, pero as far as pushing for legislation we can still work with the members of the committee, of the Congress.”
Aniya, noon pa ay malinaw na sa liderato ng Kamara at sa mga miyembro ng supermajority na may mga isyu talaga na kanilang tatayuan kagaya na lamang ng panukalang pagbabalik ng parusang kamatayan.
“I think they expected it na sa debate ng pagbabalik ng death penalty ay talagang boboto kami ng NO dahil principle stand yan. Nung sinabi ng liderato na may consequences ay tatanggapin natin yan dahil sa amin mas mahalaga na tumayo tayo sa ating prinsipyo dahil ang posisyon mo sa Kamara ay panandalian lamang yan. Patuloy po tayo sa ating advocacies, duties and responsibilities as a member of Congress.” Ani Zarate
Muling pinanindigan ni Zarate ang pagkontra sa panukalang pagbabalik ng death penalty sa bansa bagamat nananatili aniya ang kanyang suporta sa administrasyon.
“Ang masasabi ko lang parang hindi magandang precedent ito sa mga usapin ng bayan na napaka-importante ay mayroong parang arm-twisting, pressure at nire-railroad natin ang ating mga batas na kailangang pag-aralan at pag-debatehan. Pinapanatili natin ang ating independent stand on many issues, even if sinusuportahan natin ang liderato ni Speaker Alvarez at maging ang Duterte admin pero pagdating sa mga usaping kailangang tumayo tayo ay ipinapaabot talaga natin ang ating mga puna.” Dagdag ni Zarate
Pinasinungalingan din ni Zarate ang mga balitang may pagkilos ang mga kongresista para palitan sa puwesto si Speaker Pantaleon Alvarez.
“Matagal na yang ugong na yan pero sa tingin ko walang ganyang move. Wala namang kumakausap sa amin ukol diyan, dito naman sa Kamara, you will never know, pero as of now the Speaker enjoys the support of the majority. Ang liderato ng Kamara ay suportado ng mayorya kaya naisulong nila ang death penalty pero ang aming panawagan ay ituloy-tuloy sana yung democratic exchanges of ideas because we are a political body.” Pahayag ni Zarate
Matatandaang kagabi ay itinuloy na ng liderato ng Kamara ang balasahan sa mga miyembro nito kung saan 10 kongresista ang tinanggalan ng committee chairmanship at si dating Pangulo at ngayo’y Congresswoman Gloria Macapagal Arroyo ay sinibak naman bilang House Deputy Speaker.
Si Arroyo ay isa sa mga bumoto kontra sa panukalang death penalty.
By Aiza Rendon | Ratsada Balita (Interview)
