Nakahanda na ang tracker team ng Philippine National Police (PNP) sa oras na lumabas ang warrant of arrest para sa mga suspek sa Percy Lapid case.
Ito ang sinabi ni PNP Chief Police General Rodolfo Azurin Jr. na patuloy pa rin nitong hinihikayat ang mga suspek na sumuko na kabilang ang suspendidong Bureau of Corrections (BuCor) Chief Directior General Gerald Bantag at Deputy Security Officer Ricardo Soriano Zulueta.
Pinasusuko na rin ng PNP ang mga bilanggong sina Denver Batungbakal Mayores, Alvin Labra, Aldrin Galicia at Alfie Peñaredonda.
Ayon kay Azurin, handa sila na bigyang proteksyon ang mga ito kung kinakailangan.
Nabatid naman na nakatakdang maghain ng precautionary hold departure order ang Department of Justice (DOJ) laban sa mga suspek upang masigurong makahaharap ang mga ito sa preliminary investigation. - sa panulat ni Hannah Oledan at mula sa ulat ni Tina Nolasco (Patrol 11)
