Umabot ng labing limang oras (15 hours) ang Traslacion ng Itim na Nazareno.
Maituturing itong pinakamabilis, kumpara sa mga nagdaang taon.
Ayon sa Quiapo Church, opisyal na nagsimula ang Traslacion 2024 bandang 4:45 ng madaling araw.
Kaugnay nito, maraming deboto ang nagpumilit na sumampa sa andas kahit na ipinagbabawal ito.
Pagdating ng andas sa bandang Arlegui Street, naputol ang lubid nito, at nang itinakbo ng mga hijos ang nasabing tali pabalik sa Quiapo Church, pinag-agawan ito ng ilang deboto, dahil sa paniwalang may dala itong milagro.
Pinulot din ng ilan sa kanila ang mga hibla ng naputol na lubid.
Eksaktong 7:45 kagabi naman nang dumating ang andas ng Itim na Nazareno sa Quiapo Church, at sa tala ng simbahan, umabot sa mahigit anim na milyong deboto ang dumalo sa Traslacion. - sa panulat ni Charles Laureta
