Kinilala ng Malabon Local Government Unit (LGU) ang tuloy-tuloy nilang pagsasagawa ng coronavirus disease 2019 (COVID-19) testing at tracing sa pagbaba ng kaso ng virus sa lungsod.
Ayon kay Nurse Jeffrey Dela Cruz, nangangasiwa ng COVID-19 testing sa Oreta Sports Complex, ang patuloy at pinaigting na pag-test ng lungsod sa kanilang residente ay malaki ang naitulong sa pagpigil ng pagdami ng virus.
Bukod pa rito, ani Dela Cruz, kung may nakikitang pagsipa ng kaso ng COVID-19 sa ilang lugar sa lungsod ay agad nila itong pinupuntahan para rin masuri sa virus sa pamamagitan naman ng antigen testing.
Sa huli, nanawagan si Dela Cruz sa mga residente ng Malabon City na kung may nararamdamang sintomas ng virus ay agad na ipagbigay alam sa mga awtoridad para maisailalim sa libreng COVID-19 testing tuwing Lunes, Miyerkules, at Biyernes.
