Nakarating na sa Poland ang unang batch ng mga Pilipinong umalis sa Ukraine.
Mismong si DFA Secretary Teodoro Locsin Jr. ang sumalubong sa mga nasabing Pinoy nang dumating sa Border City ng Rava-Ruska-Hrebenne matapos dumalo ang kalihim sa EU Ministerial Forum for Indo Pacific Cooperation sa Paris.
Ayon kay DFA Undersecretary Sarah Lou Arriola, mahigit 40 Pinoy mula sa Lviv at Kyiv ang na evacuate na at naghihintay na lamang ng kanilang repatriation.
Binigyang diin ni Arriola na maraming Pilipino ang nagpapasaklolo sa mga otoridad ng Pilipinas subalit ayaw namang umuwi ng bansa ang mga ito dahil na rin sa magandang trabaho sa Ukraine at ang iba naman ay nakapag asawa na ng Ukrainians.
Nagpasalamat naman si Arriola sa gobyerno ng Poland sa pagbubukas ng pintuan sa mga Pilipino.
