Muling nanumpa si Makati Vice Mayor Romulo“Kid” Peña bilang acting mayor ng Makati City.
Isinagawa ang panunumpa ni Peña sa lumang Makati City Hall, mahigit isang oras, makaraang maipaskil sa bagong Makati City Hall ang anim na buwang suspension order laban kay Makati City Mayor Junjun Binay.
Kasabay nito, pinayuhan ni Peña si Mayor Binay na sumunod na lamang sa suspension order laban sa kanya ng Office of the Ombudsman upang maging magandang ehemplo sa sa sambayanan.
Matatandaan na naudlot ang pagiging acting Mayor ng Makati City ni Peña noong unang masuspindi si Mayor Binay makaraang magpalabas ng Temporary Restraining Order ang korte laban sa suspension order.
Aminado si Peña na posibleng maulit lamang ang naging karanasan nya nuong una siyang maupo bilang acting mayor dahil hindi sya nakapasok kahit minsan sa Makati City Hall.
Matatandaan na nagkaroon rin noon ng problema sa pagpapasahod sa mga empleyado ng Makati City at maging sa mga transaksyon ng syudad.
Nabunyag na hindi pa nag-uusap sina Makati City Mayor Junjun Binay at Vice Mayor Romulo “Kid” Peña mula nang sila ay maluklok sa puwesto, mahigit 5 taon na ang nakakaraan.
Si Peña ay tumakbo noong 2013 elections sa ilalim ng Liberal Party subalit dati itong independent noong manalo sa kanyang unang termino bilang Vice Mayor noong 2010.
Ayon kay Peña, bukas naman siyang makipag-usap kay Binay para sa ikagaganda pa ng kanilang pamamalakad sa Makati City pero hindi ito nangyari.
Samantala, tumanggi si Peña na kumpirmahin ang plano niyang tumakbong Mayor ng Makati sa 2016 elections.
Sa ngayon, sinabi ni Peña na nais muna niyang tutukan ang kanyang trabaho bilang acting mayor ng Makati City.
By Len Aguirre
