Nanindigan ang kampo ni Vice President Jejomar Binay na hindi aatras ang Bise Presidente sa kaniyang pagtakbo sa pagka-pangulo sa 2016 presidential elections.
Ito ang reaksyon ni Senadora Nancy Binay makaraang maungusan ni Senadora Grace Poe si Binay sa lumabas na survey ng Social Weather Stations o SWS gayundin ng Pulse Asia noong isang linggo.
Ayon sa senadora, instrumento lamang ang mga survey upang mabatid ng isang kandidato ang mga gagamitin niyang istratehiya at hindi ito nangangahulugan na ito na ang basehan ng kung sino ang mananalo sa halalan.
Ginawa ng nakababatang Binay ang pahayag kasunod ng naging patutsada ni Senador Antonio Trillanes na aatras na sa laban si VP Binay kapag pumangatlo na lamang ito sa mga ilalabas na survey sa hinaharap.
By Jaymark Dagala
