Hinamon ng Malakanyang si Vice President Sara Duterte na umuwi na ng bansa upang harapin at pasinungalingan ang iba’t ibang isyu laban sa kanya sa Pilipinas.
Ayon kay Palace Press Undersecretary Claire Castro, dapat isipin din ni VP Duterte ang kanyang responsibilidad bilang Bise Presidente ng Pilipinas at hindi lang ang kanyang tungkulin bilang anak ni dating Pangulong Rodrigo Duterte.
Sinabi ni Usec. Castro na bagama’t katanggap-tanggap ang pagsoklolo ni VP Sara sa ama nito na nasa kustodiya sa ICC ay huwag din sana aniyang makalimutan ang kanyang tungkulin na pagsilbihan ang mga taong bumoto sa kanya.
Dapat din aniyang sagutin ng pangalawang pangulo ang mga katanungan kaugnay sa paggamit ng confidential funds ng kanyang opisina, matapos lumutang ang mga bagong kahina-hinalang pangalan na nakatanggap ng mga pekeng resibo.
Dahil dito, hinimok ng Palace Official ang mga kongresista na mas paigtingin pa ang imbestigasyon sa paggamit ng OVP sa confidential funds dahil karapatan aniya ng taumbayan na malaman kung paano ginastos ang pondo.—sa panulat ni John Riz Calata
